Ba'zi bemorlar tana harorati doimiy ravishda 37,5–38,5 daraja atrofi subfebril ko'tarilib turishidan shikoyat qiladilar. Shunday bo'lsa-da, ular kunlik hayot tarzini va ish faoliyatini davom ettiraveradilar. Bunday holatda aspirin yoki paratsetamol kabi isitmani tushiruvchi vositalar qabul qilinganda ham tana harorati pasaymasligi kuzatiladi.
Bunday subfebril holatda quyidagi ikkilamchi alomatlar namoyon bo'lishi mumkin:
- Bo'g'imlarda og'riq va qaqshash hissi;
- Ishtahaning pasayishi;
- Ko'p terlash (gipergidroz);
- Yuqori xavotir, qo'rquv va vahima holatlari.
Klinik amaliyotda bemorlar bilan muloqot o'tkazilganda, ushbu holat ko'pincha boshdan kechirilgan kuchli ruhiy va hissiy stressdan so'ng yuzaga kelgani aniqlanadi. Stress omillari tana haroratini va termoregulatsiyani boshqaruvchi bosh miya markazi — gipotalamus faoliyatiga to'g'ridan-to'g'ri ta'sir ko'rsatishi mumkin (psixogen isitma).
Tibbiy va laborator diagnostika usullari orqali tashxis tasdiqlangach, bemorga moslashtirilgan kompleks davolash kursi belgilanadi hamda umumiy salomatlik ko'rsatkichlari tiklanadi.
